Franciyalı belgili dirijyor, «Kórkem óner hám ádebiyat kavaleri» ordeni iyesi Natali Maren qatnasıwında koncert baǵdarlama shólkemlestirildi
Usı jıldıń 15-aprel kúni Berdaq atındaǵı Qaraqalpaq mámleketlik akademiyalıq muzıkalı teatrında belgili Franciyalı dirijyor, «Kórkem óner hám ádebiyat kavaleri» ordeni iyesi Natali Maren hám Ózbekstan mámleketlik konservatoriyası Nókis filialınıń «Simfoniyalıq orkestri» menen birgelikte koncert baǵdarlaması shólkemlestirdi.
Koncert baǵdarlamasın Qaraqalpaqstan Respublikası Joqarǵı Keńesiniń komitet baslıǵı M.Atamuratov kiris sóz benen ashıp berdi.
Onda Natali Maren hám «Simfoniyalıq orkestr» menen birgelikte janlı tárizde atqarılǵan milliy hám jáhán klassikalarınıń úylesimligi, orkestrdiń qúdiretli namaları tamashagóylerdiń qálbinde ózgeshe tásir qaldırdı.
Janlı tárizde bolıp ótken koncert baǵdarlaması bársheni tolqınlandırıp, qatnasıwshılardı haqıyqıy simfoniya dúnyasına alıp kirdi desek asıra aytqan bolmaymız.