Ózbekstan Respublikası Prezidenti Sh.M.Mirziyoevtıń 2020-jıl 2-oktyabr kúni Qaraqalpaqstan Respublikasına saparı dawamında hám de Qaraqalpaqstan Respublikası Joqarǵi Kenesiniń náwbetten tısqarı segizinshi sessiyasında berilgen tapsırmalar hám keń túrde ótkerilgen 73-sanlı jıynalıs protokolınıń 94-bandinde Ózbekstan Mámleket konservatoriyasınıń Nókis filialın shólkemlestiriw boyınsha wazıypalardan kelip shıǵıp, Ózbekstan Respublikası Ministrler Kabinetiniń 2021-jıl 5-apreldegi «Ózbekstan Mámleket Konservatoriyasiniń Nókis filialın shólkemlestiriw haqqında»gi 186-sanlı sheshimine qaray filial iskerligi Nókis qánigelestirilgen mádeniyat mektep bazasında shólkemlestirildi.
2021/2022-oqıw jılına bakalavriat tálim baǵdarları boyınsha qabıllaw procesi hám dóretiwshilik imtixanlar Ózbekstan Mámleket konservatoriyasında ótkerildi.
Ózbekstan Mámleket konservatoriyası Nókis filialına 2021/2022-oqıw oqıw jılında 5 jónelis boyınsha jámi 47 student oqıwǵa qabıl qilildi.
Professional tálim (baǵdarları boyınsha ),
Kórkem ónertanıw: Musiqtanıw,
Dirijyorlıq, (túrleri boyınsha )
Vokal kórkem óneri (túrleri boyınsha ),
Saz atqarıwshılıǵı (túrleri boyınsha )
qánigelikleri boyınsha tálim alıp atır.
Qaraqalpaqstan Respublikasında xızmet kórsetken artist, “Shuhrat” medalınıń iyesi, docent Allanbaev Rudakiy Orinbaevich basshılıq etip kiyatırǵan filialda házirgi kúnde,
“Muzıka kórkem óneri” fakulteti,
“Ulıwma kásiplik hám social-gumanitar pánler” kafedrası,
“Saz atqarıwshılıǵı” kafedrası iskerlik júrgizip, kafedralarda jámi jigirmadan aslam professor-oqıtıwshılar studentlerge joqarı dárejede bilim berip kelip atır.
Ózbekstan Mámleketlik Konservatoriyasınıń Nókis filialı óziniń dáslepki oqıw jılın 2021-jıl 6-sentyabr kúni basladı. Bul múnásibet penen Nókis qánigelestirilgen mádeniyat mektebinde filialdıń ashılıw dástúri bolıp ótti.
Rudakiy Allanbaev basshılıǵında filialda tálim alıp atırǵan studentlerge qolaylı shárt-shárayatlar jaratıw hám filialdıń materiallıq-texnikalıq bazasın bekkemlew hám muzıka ásbapları menen támiyinlew maqsetinde Ózbekstan Mámleketlik konservatoriyasınan Kontrabas, Fagot, Trombon, Truba, Tuba, Valtorna, Litavra jámi 7 dana muzıka ásbapları hám bes júzge jaqın oqıw ádebiyatlar, on bes mıńǵa jaqın elektron kitaplar alıp kelindi.
Filialda 2021-2022-oqıw jılında “Xalıq sazları” ansamblı, “Xalıq sazları” orkestri, “Simfoniyalıq” hám “Kamer” orkestri shólkemlestirildi.
Qararǵa muwapıq, tastıyıqlanǵan joybar-smeta hújjetleri tiykarında filial ushın 300 orınlı oqıw imaratı, 2 koncert zalı ( 200 orınlı koncert zalı, 100 orınlı organ zalı ), 200 orınlı studentler turar jayı hám sport maydanların qurıwdı 2022-jıl hám de keyingi jıllarǵa mólsherlengen Investiciya baǵdarlamasına kirgiziw belgilengen.