Category Archives: Без рубрики

3-yanvar kúni  Ózbekstan mámleketlik konservatoriyası Nókis filialında direktordıń oqıw isleri boyınsha orınbasarı T.Utepova basshılıǵında hám professor-oqıtıwshılardıń qatnasıwında oqıw metodikalıq keńes  bolıp ótti. Ilajdı T.Utepova ashıp berdi hám basqarıp bardı. Sońınan, bilimlendiriw sapasın qadaǵalaw bólimi baslıǵı S.Pirnazarov shıǵıp sóylep, ótken semester dawamındaǵı Hemis platformasında professor-oqıtıwshılardıń sabaq ótiw barısı analizlendi. Onnan soń, fakultet dekanı B.Seytanov juwmaqlawshı imtixanlar buyrıǵın tayarlaw, grafigi boyınsha imtixan ótkeriw tártibi, muǵallimlerdiń tayarlıǵı, imtixanlardı tuwrıdan-tuwrı Youtube arqalı translyatsiya  etiwge tayarlıq processleri haqqında ilaj qatnasıwshılarına túsindirip ótti. Ilaj juwmaǵında kafedra basshısı T.Dawletbaev sózge shıǵıp, oqıw tanısıw, ámeliy hám pedagogikalıq ámeliyat ótkeriwge tayarlıq kóriw boyınsha toqtalıp ótti.

Usı jıldıń 28-dekabr kúni Ózbekstan mámleketlik konservatoriyası Nókis filialında professor-oqıtıwshılar hám administraciya xızmetkerleri arasında «Zakovat Quiz» intellektual oyını bolıp ótti. Ótkerilgen intellektual oyındı jaslar awqamı baslanǵısh shólkemi jetekshisi A.Matjanbaev alıp bardı. Oyın jámi 4 komanda dúzildi. «Zakovat Quiz» intellektual oyının ótkeriwden tiykarǵı maqset jańa jıl bayramı aldınan filialımızda jumıs alıp barıp atırǵan bárshe pidayı jumısshılarımızǵa bayram keypiyatın bólisiw, sonday-aq, olardıń logikalıq pikirlew qábiletin rawajlandırıw hám xoshametlew bolıp tabıladı. Intellektual oyında hár bir komanda quramı belsene qatnastı hám oyın juwmaǵında jeńimpazlarǵa húrmet jarlıqları tapsırıldı.

Biziń filialımızda hár bayram aldınan xızmetkerlerge  sawǵalar  beriw úrdiske aylandı desekte boladı. Mine, usı múnásibet penen 28-dekabr kúni jańa jıl bayramı aldınan filialımızdıń gúllep rawajlanıwı ushın ayanbay miynet etip atırǵan hár bir xızmetkerlerge bayram aldınan jańa jıl sawǵaları tapsırıldı. Bunday húrmet hám itibar ushın Ózbekstan mámleketlik konservatoriyası Nókis filialınıń  basshılarına hám baslanǵısh kásiplik awqamı komiteti baslıǵı B.Bektursinovqa ayrıqsha minnetdarshılıq bildiremiz.

Usı jıldıń 28-dekabr kúni  Ózbekstan mámleketlik konservatoriyası Nókis filialında  náwbettegi Keńes májilisi  bolıp ótti. Ilajdı Ózbekstan mámleketlik konservatoriyası Nókis filialınıń direktorı, Keńes baslıǵı  R.Allanbaev ashıp berdi hám basqarıp bardı. Keńes májilisinde tómendegi tiykarǵı máleleler qaralıp ótildi: Onnan soń aǵımdaǵı máseleler qaralıp shıǵıldı.

Ózbekstan mámleketlik konservatoriyası Nókis filialı “Muzıka kórkem óneri” fakulteti Keńesi bolıp ótti. Ilajdı fakultet dekanı B.Seytanov kiris sóz benen ashıp berdi. Ol dáslep fakultet oqıtıwshıların kirip kiyatırǵan jańa jıl bayramı menen qutlıqlap ótti. Sońınan, 2023-2024-oqıw jılınıń birinshi yarım jıllıq juwmaqlawshı qadaǵalaw jumısları hám filialımızdıń professor-oqıtıwshıları hám student-jaslarınıń oqıwı dawamında erisken jetiskenlikleri boyınsha bayanat berdi. Onnan soń, 2023-2024 oqıw jılınıń ekinshi yarım jıllıǵı ushın Hemis platformasına kerekli resurs hám basqada kerekli hújjetlerdi jaylastırıw haqqında bayanat jasadı. Ilaj juwmaǵında aǵımdaǵı máseleleler dodalandı.

Búgin 23-dekabr kúni paytaxtımız Nókis qalasında jaylasqan jaslar orayında Jaslar awqamı Qaraqalpaqstan Respublikası Keńesi Baslıǵınıń qatnasıwında «Basshı hám jaslar» atamasında ushırasıw shólkemlestirildi. Ilajǵa filialımızdıń jaslar jetekshisi A. Matjanbaev hám student-jaslar qatnastı. Biz ushın eń quwanıshlısı, ótkerilgen ushırasıwda filialımızda óziniń iskerligi menen studentlerimizdi watansúyiwshilik hám ulıwmainsanıylıq ruwxında, milliy qádiriyatlarǵa say ráwishte belsendilikke baǵdarlap kiyatırǵan jaslar jetekshisi A. Matjanbaev xoshametlendi hám bahalı sawǵalar menen sıylıqlandı. Biz, A. Matjanbaevti erisken jetiskenligi menen qutlıqlaymız, aldaǵı jumıslarında tabıslar tileymiz. Konservatoriyanıń málimleme xızmeti:

Ózbekstan mámleketlik konservatoriyası Nókis filialında student jaslardıń bilimin elede jetilistiriw, tálim sapasın arttırıw maqsetinde «Kvarta-kvinta» dógeregi sheńberinde Muzika tarıyxı páninen qosımsha interaktiv sabaqlar shólkemlestirilgen edi. Usı dógerektiń náwbettegi sabaǵı búgin 24-oktyabr kúni filialdıń ulıwma kásiplik hám social-gumanitar pánler kafedrası oqıtıwshıları R.Abatbaeva hám V.Lyubimceva basshılıǵında hám student jaslar qatnasıwında bolıp ótti. Bul sabaq jańa texnologiyalar hám metodlardan paydalanılǵan halda, studentler tolıq sabaqqa qamtıp alınıp, interaktiv usılda ótkerilip, studentler pikirleri tıńlandı.Filialımızda usınday interaktiv sabaqlardıń tez-tezden ótkeriliwi studentlerdiń teoriyalıq bilimlerin elede jetilistiriwge kómek beriwi sózsiz.

Ózbekstan mámleketlik konservatoriyası Nókis filialında  «Qızlarjan» klubı óz jumısın alıp barmaqta. Bul klubqa tiykarınan qosıq, maqala jazıwǵa, súwret salıwǵa, aspazlıqqa uqıbı bar sonday-aq, oqıwda hám jámiyetlik jumıslarda belsene qatnasatuǵın qızlar jámlestirip alınǵan. Filialımızdıń «Qızlarjan» klubın  hayal-qızlar másláhát keńesiniń baslıǵı G.Qudaybergenova  alıp baradı. Bul klub qızlardı tek gána jámiyette belsendi shaxs etip tárbiyalap qoymastan, shańaraqta úlgili kelin, mehriban ana bolıwǵada úyretip baradı.Usınday klublardıń shólkemlestiriliwi erteńgı keleshegimiz bolǵan jas áwladtiń sanasında  Ana Watanǵa degen súyispenshiligin elede arttıradı.Mine, usınday  maqsette iskerligin kórsetip atırǵan bul klubtıń basshısı   G.Qudaybergenova usı jıldıń 24-oktyabr kúni  «Qızlarjan» klubında ózleriniń belsendiligin kórsetip kiyatırǵan bir qatar student jaslarımızǵa diplom hám bahalı sawǵalar tapsırdı.

Búgin 25-oktyabr kúni Ózbekstan mámleketlik konservatoriyası Nókis filialında Professor, Ózbekstan xalıq artisti, “Ózbekstan Respublikasında xızmet kórsetken jaslar ustazı”, Qaraqalpaqstanǵa xızmet kórsetken artist, mámleketlik sıylıqlardıń laureatı Najimatdin Ańsatbaevtiń 80 jıllıq yubileyi hám  P.Mamutovtıń «Aktyor hám rejissyor Najimatdin Ańsatbaev» atlı monografiyasınıń prezentaciyası bolıp ótti. Ilajdı filialımız direktorı R.Allanbaev kiris sóz benen ashıp berdi, jıynalǵanlardı qutlıqlap ótti hám P. Mamutovtıń monografiyasına bahalı pikirlerin bildirdi.Ilaj oqıtıwshı hám dirijyor P. Tnıbaev basshılıǵındaǵı simfoniyalıq orkestriniń  A. Babajanyan  «Noktyurn» muzıkasın atqarıw menen baslandı.Sonday-aq, Qaraqalpaqstanǵa xızmet kórsetken artist, «Shuhrat» medalı iyesi, professor R. Allanbaev Abay Qunanbaev sózine «Kózińniń qarası» qosıǵın  janlı atqarıp, tamashagóylerdiń keypiyatın ele de kóterdi. Ilaj sebepshisi Najimatdin Ańsatbaev Saparbay Palwanov naması, Tilewbergen Jumamuratov sózine «Ana haqqında qosıq» tı ustazımız P. Mamutov penen birge atqarǵanlıǵı kútilmegen sawǵa boldı. Sebebi N. Ańsatbaev jası úlken bolıwına qaramastan hawazı janǵa jaǵımlı. Koncert dawamında Najimatdin Ańsatbaevtiń kásiplesleri, shákirtleri hám perzentleri shıǵıp 80 jasqa tolıwı múnásibeti menen qutlıqladı, filial direktorı R.Allanbaevqa ayrıqsha minnetdarshılıq bildirdi.

Usı jıldıń 25-oktyabr kúni Nókis qalasındaǵı 12-sanlı Ámet baqsı atındaǵı muzıka hám kórkem óner mektebinde Ózbekstan mámleketlik konservatoriyası Nókis filialı fortepiano (organ) tálim baǵdarınıń tájiriybeli oqıtıwshıları A.Saidxonov hám R.Iseev basshılıǵında fortepiano (organ) bóliminiń 2 hám 3 basqısh student jaslarınıń koncert baǵdarlaması bolıp ótti. Koncert dawamında student jaslar shet el kompozitorlarınan Sergey Prokofev, Dmitriy Shostakovich, Bela Bartok, Eduard Bagdasaryan, Pyer Sankan, Dmitriy Kabalevskiy, ózbek kompozitorlarınan Rustam Abdullaev, Sovet Varelas, Dilorom Omanullaeva hám qaraqalpaq kompozitorlarınan Ǵayip Demesinov, jáne de Ulbiybi Abdullaevanıń shıǵarmaları shertildi. Bolıp ótken koncert baǵdarlamasında student jaslar jıynalǵanlardıń keypiyatın kóterdi.