Psixolog — bul psixologiya tarawındaǵı qánige. Insannıń sociallıq ómirindegi xarakterin, minez-qulqın, psixologiyalıq jaǵdayın úyrenedi. Psixolog turmısta unamsız jaǵdaylarǵa túsip qalǵan, unamlı tárepke ózgeriwge háreket etip atırǵan, psixologiyalıq tárepten salamat hám qollap-quwatlawǵa mútáj bolǵan insanlar menen isleydi. Psixolog penen ata-analar, student—jaslar hám oqıtıwshılar ortasındaǵı maǵlıwmatlar sır saqlanıwına kepillik beredi.

Ámeliy psixologiyalıq iskerliginiń  tiykarǵı wazıypası:

 Ózbekstan Respublikası rawajlanǵan mámleketler qatarınınan múnásip orın iyelewine óziniń úlesin qosatuǵın,  sociallıq-ekonomikalıq ózgerislerdi basqara  alatuǵın hám XXI ásir talaplarına juwap  beretuǵın kadrlardı tayarlawǵa hár tárepleme   kómeklesiw.

 Psixolog, tiykarınan, tómendegi baǵdarlar boyınsha jumıs alıp baradı:

Psixologiyalıq, ruwxıy-aǵartıwshılıq úgit-násiyat

Pedagogikalıq jámáát, studentler hám ata-analardıń psixologiyalıq bilimlerdi iyelewge, olardıń psixologiyalıq mádeniyatın asırıw maqsetinde túrli shınıǵıwlar,  seminar -treningler, lekciyalar shólkemlestiriwden ibarat iskerlik forması.

Psixologiyalıq profilaktika

Pedagoglar, student-jaslar hám ata-analarda shaxstıń hárbir jas dáwirindegi psixologiyalıq rawajlanıwı haqqındaǵı ilimiy psixologiyalıq bilimlerdi iyelewi menen insan shaxsınıń intellektual rawajlanıwında júz beriwi múmkin bolǵan hárqanday sebeplerin  waqtında aldın alıwǵa qaratılǵan psixologiyalıq ilajlar baǵdarı.

Psixologiyalıq diagnostika

Studentlerdi tálim procesinde psixologiyalıq–pedagogikalıq tárepten tereńirek úyreniwge baǵdarlanǵan bolıp, olardıń individual qásiyetlerin, tálim hám tárbiyadaǵı kemshilikleriniń sebeplerin anıqlawǵa baǵdarlanǵan.

Psixologiyalıq másláhát

Bunda professor-oqıtıwshılar, ata-analar hám studentlerge jeke, kásiplik hám turmıslıq máselelerin sheshiwge járdem beredi, olardıń óz psixologiyalıq salamatlıǵın qorǵawǵa úyretedi.

Psixologiyalıq korrekciya

Psixologtıń insan shaxsı hám individuallıǵın anıqlaw procesine aktiv tásir ótkeriw iskerlik forması bolıp tabıladı.