Ózbekstan mámleketlik konservatoriyası Nókis filialı Ózbekstan Respublikası Prezidenti Sh.M.Mirziyoyevtıń 2020-jıl 2-oktyabr kúni Qaraqalpaqstan Respublikasına saparı dawamında hám de Qaraqalpaqstan Respublikası Joqarǵı Keńesiniń gezekten tıs segizinshi sessiyasında berilgen tapsırmalar hám keń túrde ótkerilgen 73-sanlı jıynalıs bayanlamasınıń 94-bántinde Ózbekstan mámleketlik konservatoriyasınıń Nókis filialın shólkemlestiriw boyınsha wazıypalardan kelip shıǵıp, Ózbekstan Respublikası Ministrler Kabinetiniń 2021-jıl 5-apreldegi «Ózbekstan mámleketlik konservatoriyasınıń Nókis filialın shólkemlestiriw is-ilajları haqqında»ǵı 186-sanlı qararına muwapıq filial iskerligi Nókis qánigelestirilgen mádeniyat mektep bazasında shólkemlestirildi. 2021/2022-oqıw jılına bakalavriat tálim baǵdarları boyınsha qabıllaw procesi hám dóretiwshilik imtixanlar Ózbekstan mámleketlik konservatoriyasında ótkerildi. Ózbekstan mámleket konservatoriyası Nókis filialına 2021/2022-oqıw jılında 5 jónelis boyınsha jámi 47 student oqıwǵa qabıllandı. Olar:
Professional tálim (baǵdarları boyınsha)
Kórkem ónertanıw: Muzıkatanıw
Dirijyorlıq, (túrleri boyınsha)
Vokal kórkem óneri (túrleri boyınsha)
Saz atqarıwshılıǵı (túrleri boyınsha) qánigelikleri boyınsha tálim alıp atır. Qaraqalpaqstan Respublikasında xızmet kórsetken artist, “Shuhrat” medalınıń iyesi, professor Allanbaev Rudakiy Orınbaevich basshılıq etip kiyatırǵan filialda búgingi kúnde,
“Muzıka kórkem óneri” fakulteti,
“Ulıwma kásiplik hám social-gumanitar pánler” kafedrası,
“Saz atqarıwshılıǵı” kafedrası iskerlik júrgizip, kafedralarda jámi otızǵa jaqın professor-oqıtıwshılar studentlerge joqarı dárejede bilim berip atır. Ózbekstan mámleketlik konservatoriyası Nókis filialı óziniń dáslepki oqıw jılın 2021-jılı 6-sentyabr kúni basladı. Usı múnásibet penen Nókis qánigelestirilgen mádeniyat mektebinde filialdıń ashılıw máresimi bolıp ótti. Rudakiy Allanbaev basshılıǵında filialda tálim alıp atırǵan studentlerge qolaylı sharayatlar jaratıw, filialdıń materiallıq-texnikalıq bazasın bekkemlew hám muzıka ásbapları menen támiyinlew maqsetinde Ózbekstan mámleketlik konservatoriyasınan kontrabas, fagot, trombon, truba, tuba, valtorna, litavra jámi 7 dana muzıka ásbabı hám bes júzge jaqın oqıw ádebiyatlar alıp kelindi. Filialda 2021-2022-oqıw jılında “Xalıq sazları” ansambli, “Xalıq sazları” orkestri, “Simfoniyalıq”, “Demli sazlar”, “Kamer” orkestri shólkemlestirildi. Qararǵa muwapıq, tastıyıqlanǵan joybar-smeta hújjetleri tiykarında filial ushın 300 orınlı oqıw imaratı, 2 koncert zalı (200 orınlı koncert zalı, 100 orınlı organ zalı) 2025-jılı qurıp pitkerildi hám paydalanıwǵa tapsırıldı. Al 200 orınlı studentler turar jayı hám sport maydanların qurıwdı keyingi jıllarǵa mólsherlengen investiciya baǵdarlamasına kirgiziw belgilengen.