festivaldıń ashılıw hám sıylıqlaw máresimi haqıyqıy bayramǵa aylanıp ketti.

2024-jıl 17-may kúni Ózbekstan mámleketlik konservatoriyası Nókis filialında ótkerilgen»Jayxun tolqınları» I Respublikalıq xalıq sazları orkestri festivalınıń saltanatlı sıylıqlaw máresimi dáslep festival nızamı hám qatnasıwshıların tanıstırıwdan baslandı. Festival Qaraqalpaqstan Respublikasındaǵı balalar muzıka hám kórkem óner mektepleri, qánigelestirilgen kórkem óner hám mádeniyat mektepleri, joqarı oqıw orınları hám professional jámáátlerinde xalıq sazları orkestri atqarıwshılıǵın rawajlandırıwǵa járdem beriw, zamanagóy muzıka menen tanıstırıw hám áhmiyetin jáne de asırıwdan ibarat ekenligi atap ótildi.

Tóreshiler quramı: Oydin Abdullaeva — Zulfiya atındaǵı mámleketlik sıylıqtıń iyesi, Ózbekstan Oliy Majlisi Nızamshılıq palatasınıń Ilim, bilimlendiriw, mádeniyat hám kórkem óner máseleleri komiteti aǵzası, professor,  Komiljon Shermatov — Ózbekstanda xızmet kórsetken artist, professor,  Ǵayrat Abrarov — Ózbekstan mámleketlik konservatoriyası docenti,  Batir Dosimbetov — Ózbekstan mámleketlik konservatoriyası docenti.Festival qatnasıwshıları 2 toparǵa bólingen halda óz talantların sınnan ótkerdi.
Bunda birinshi topar — balalar muzıka hám kórkem óner mektepleri hám de muzıka hám kórkem óner mektep-internatlari oqıwshılarınan ibarat.
Ekinshi topar- joqarı oqıw orınları, qánigelestirilgen kórkem óner hám mádeniyat mektepleri hám professional jámáátlerinen ibarat.

Birinshi toparǵa Qaraqalpaqstan Respublikasındaǵı jámi 24 balalar muzıka hám kórkem óner mektepleri arasınan xalıq sazları orkestri shólkemlestirilgen 10 balalar muzıka hám kórkem óner mektepleri qatnastı.
Bular: Nókis qalası 1-sanlı, Tórtkul rayonı 3-sanlı, Xojeli rayonı 5-sanlı, Beruniy rayonı 6-sanlı, Amiwdarya rayonı 9-sanlı, Qaraózek rayonı 16-sanlı, Taxtakópir rayonı 17-sanlı, Qanlıkól rayonı 19-sanlı, Amiwdarya rayonı 21-sanlı, Nókis qalası 22-sanlı balalar muzıka hám kórkem óner mektepleri xalıq sazları orkestrları.
Ekinshi topar Ózbekstan mámleketlik kórkem óner hám mádeniyat institutı Nókis filialı, Berdaq atındaǵı Qaraqalpaq mámleketlik universiteti, Nókis qánigelestirilgen mádeniyat mektebi, Ózbekstan mámleketlik filarmoniyası Qaraqalpaqstan Respublikası bólimi hámde Ózbekstan mámleketlik konservatoriyası Nókis filialı xalıq sazları orkestrları qatnastı.

Bilesizbe dúnyanıń rawajlanǵan mámleketlerinde de kórkem óner álemi ele gúwa bolmaǵan, ginnestiń rekordlar kitapına kiriwge arziytuǵın, 400 den zıyat sazendeler quramınan ibarat orkestr jámáátiniń birgelikte shıǵarma atqarıwınıń gúwası bolmaǵan ekenbiz, mine siz hám biz bul hádiysege Qaraqalpaqstan tariyxında birinshilerden bolıp gúwası boldıq desek qátelespegen bolamız.
Festivalda filialımızdıń aǵa oqıtıwshısı, kompozitor R.Abatbaevanıń «Jayxun tolqınları» atamasındaǵı shıǵarması dirijyor H.Rajabov basshılıǵında birinshi topar qatnasıwshıları jámi 248 sazende, yaǵniy Qaraqalpaqstan Respublikasındaǵı balalar muzıka hám kórkem óner mektepleriniń xalıq sazları orkestri tárepinen joqarı dárejede birinshi márte atqarıldı hám festivaldı ótkeriwde jaqınnan járdem bergeni hám usınday xalıq sazları orkestrin shólkemlestirgenlikleri ushın festivalda qatnasqan balalar muzıka hám kórkem óner mektepleri basshılarına minnetdarshılıq bildirildi. Jayxun tolqınları festivalı filial ilimiy dóretiwshilik baǵdarına da úlken jol ashtı. Fililımızdıń ilimiy potencialı joqarılawında óz miynetleri menen úles qosqan ustazlarımız  kompozitor H.Rajabov-professor, Sazende P.Qurbanazarov- docent, dirijyor P.Tnıbaev-docent ilimiy ataqlarına Joqarı Attestaciya Komissiyası tárepinen tastıyıqlandı. Usı múnásibet penen guwalıqlardı Qaraqalpaq mámleketlik universiteti rektorı, akademik A.Reymov óz iyelerine saltanatlı túrde tapsırdı.
Festival jáne bir orkestr jámáátiniń ájayip shıǵıwı menen dawam etti. Ózbekstan hám Qaraqalpaqstan kórkem óner ǵayratkeri, Mámleketlik sıylıqlardıń iyesi, ustaz Najimaddin Muxammeddinovtıń – «Gúlayim» etno-operasınan Uvertyurası jıynalǵanlardı haqıyqıy muzıka álemine alıp kirdi. Shıǵarmanı Qaraqalpaqstan Respublikasına xızmet kórsetken jaslar ustazı, «Shuhrat» medalı iyes,Ózbekstan mámleketlik konservatoriyası Nókis filialı professorı Hikmat Rajabov dirijyorlıǵında, festivaldıń 2-topar qatnasıwshıları jámi 157 sazende bir bolıp atqardı. Sonnan keyin, «Jayxun tolqınları» I Respublikalıq xalıq sazları orkestri festivalınıń nominaciya jeńimpazları anıqlandı. Taxtakópir rayonı 17-sanlı balalar muzıka hám kórkem óner mektebi xalıq sazları orkestri dirijyorı- Tólepbergen Xudaybergenov, Ózbekstan mámleketlik filarmoniyası Qaraqalpaqstan Respublikası bólimi xalıq sazları orkestri dirijyorı-Miras Xabipovlar  «Eń jaqsı dirijyor» nominaciyası jeńimpazı boldı hám diplom menen sıylıqlandı. Sonday-aq, «Eń jaqsı jas atqarıwshı», «Eń jaqsı sazende» nominaciyaları boyınsha jeńimpazlarınıń hár birine diplom berildi. Sonıń menen bir qatarda, festivalda belsendi qatnasqanı ushın barlıq orkestr jámáátine diplom hám estelik sawǵaları tapsırıldı. Festival tóreshiler quramı aǵzası, Ózbekstanda xızmet kórsetken artist, professor Komiljon Shermatov Jayxun tolqınları I Respublikalıq xalıq sazları orkestri festivalınıń saltanatlı sıylıqlaw máresiminde festival qatnasıwshıları  menen birge  «Arabcha raqs» shıǵarmasın atqardı. «Jayxun tolqınları» — I Respublikalıq xalıq sazları orkestri festivalı respublika sazendelerin bir jerge jámledi.

Ózbekstan mámleketlik konservatoriyası Nókis filialında ótkerilgen «Jayxun tolqınları» I Respublikalıq xalıq sazları orkestri festivalı jeńimpazları anıqlandı.
Birinshi topar boyınsha:
1-orın — Xojeli rayonı 5-sanlı balalar muzıka hám kórkem óner mektebi xalıq sazları orkestri.
2-orın — Ámiwdárya rayonı 21-sanlı balalar muzıka hám kórkem óner mektebi xalıq sazları orkestri.
3-orın Nókis qalası 22-sanlı balalar  muzıka hám kórkem óner mektebi xalıq sazları orkestri iyeledi.
Ekinshi topar boyınsha:
1-orın Ózbekstan mámleketlik konservatoriyası Nókis filialı xalıq sazları orkestri.
2-orın  Ózbekstan mámleketlik filarmoniyası Qaraqalpaqstan Respublikası bólimi xalıq sazları orkestri.
3-orın Nókis qánigelestirilgen mádeniyat mektebi xalıq sazları orkestri jeńip alıwǵa miyassar boldı.

Barlıq jeńimpazlar shólkemlestiriwshiler tárepinen bahalı sawǵalar menen sıylıqlandı. Birinshi hám ekinshi orın iyelerine televizor, úshinshi orın iyelerine pılesos sonday-aq, statuetka, diplom hám estelik sawǵaları tapsırıldı.